Premio Xosé Neira Vilas de Literatura Xuvenil
- Detalles
O 3 de novembro de 2024 (Día de Neira Vilas e Día da Lectura) remata o prazo para achegar os orixinais que optan a este novo certame. As obras deberán estar escritas en galego, adscritas ao xénero da novela, conterán entre 150.000 e 300.000 caracteres, está dotado con 6000 euros e o gañador darase a coñecer o 2 de abril (Día do Libro Infantil e Xuvenil).
PREMIO ARUME DE POESÍA PARA A INFANCIA: ABERTO O PRAZO PARA A PRESENTACIÓN DE ORIXINAIS
- Detalles
O 15 de novembro remata o prazo para a recepción de orixinais que concorran a esta terceira edición do Premio Arume de Poesía para a Infancia, que organizan conxuntamente a Fundación Xosé Neira Vilas, GALIX e Deleite. O galardón conta cunha dotación de 1000 euros e será publicado por Edicións Embora. As obras candidatas, de temática libre e acaída para un publico infantil e xuvenil, terán unha extensión mínima de 350 versos e poderán conformar un só poema ou un grupo de poemas. A entrega do premio terá lugar o 13 de decembro de 2024.
Na edición anterior foi premiada a proposta Versos (a)variados, de Pablo Nogueira, namentras que na de 2022 concedéuselle o galardón á obra Os versos da Mariola, de Antón Cortizas.
OS VERSOS DA MARIOLA: UNHA PROPOSTA PARA SEGUIR XOGANDO
- Detalles
Os versos da mariola, poemario de Antón Cortizas inspirado nun bo feixe de xogos tradicionais, dispón xa dunha unidade didáctica á que pode accederse dende a páxina web da Embora Edicións.
Este libro, galardoado no seu día co Premio Arume de Poesía para a Infancia que promove a Fundación Xosé Neira Vilas conxuntamente con Deleite e GÁLIX, expándese agora cara esta nova proposta que permite seguir afondando nos misterios e a beleza da poesía, co foco posto na dimensión lúdica que se acada alí onde se xuntan os xogos e os versos.
